Ақмола облысында мешіттерден бірнеше рет ұрлық жасаған күдікті ұсталды

Polisia.kz хабарлауынша 9 желтоқсанда Целиноград полиция бөліміне мешіт қызметкерінің ұрлық туралы телефон хабарламасы келіп түсті. Ер адам 8-9 желтоқсан аралығында белгісіз адамдар ғимараттың пластикалық есігін бұзып, сейфтен 649 мың теңге ақша ұрлап әкеткенін хабарлады.

Жедел-тергеу тобы оқиға орнынан күдіктінің саусақ іздерін алып, қаскүнемнің сейф есігін ашу үшін қолданған құралдардың іздерін зерттеді, бейнебақылау камераларының жазбаларын қарады, сондай-ақ ықтимал куәгерлерден сұхбат алды.

Қабылданған шаралардың нәтижесінде полицейлер күдіктіні анықтады. Ол бұрын мешіттерден ұрлық жасағаны үшін бірнеше рет қылмыстық жауапкершілікке тартылған, Қосшы қаласының 27 жастағы тұрғыны болып шықты.

Осы факті бойынша полиция бөлімі ҚР ҚК-нің 188-бабының 3-бөлігі (Ұрлық) бойынша сотқа дейінгі тергеу бастады.