Тұмауға қарсы екпені елорданың 102 мыңға жуық тұрғыны салдырған

Елордада 101 950 адам Бастапқы медициналық-санитариялық көмек көрсету ұйымдарында тұмауға қарсы вакцина алды, деп хабарлады paryz.kz, қала әкімдігінің баспасөз қызметіне сілтеме жасап.

Тұмауға қарсы екпе ұлттық екпе күнтізбесіне кірмейді, бірақ, жыл сайын жергілікті бюджеттен сатып алынады. Биыл халықты вакцинациялау үшін 110 мың доза сатып алынды. Әдетте, тегін вакцинация тобына мына санаттағы азаматтар кіреді:

- созылмалы аурулары бар 18 жасқа дейінгі балалар;

- медицина қызметкерлері;

- жүкті әйелдер (жүктіліктің 2-3 триместрі);

- жабық үлгідегі мекемедегі адамдар (балалар үйі, мектеп интернаты);

- мүгедектер, ересектер және созылмалы аурулары бар балалар;

- 60 жастан асқан қарттар.

"Дәстүрлі түрде екпе қазан-қараша айларында жүргізіледі. Коронавирус инфекциясы пандемиясына байланысты, маусымдық аурулар кезеңіндегі жағдай күрделене түсуі мүмкін. Бұған жол бермеу үшін вакцинацияны алдыңғы жылдарға қарағанда ертерек бастау керек болды. Бұл өз нәтижесін берді", - деп атап өтті БМСК басқармасының бөлім басшысы Әлия Өмірзақова.

Атап айтқанда, елордада тұмауға қарсы вакцинация науқаны 10 қыркүйекте басталып, 15 қазанға дейін созылған еді. Ал әлеуметтік желілерде көпшілік оған қарсылық білдіріп, екпені денсаулыққа зиян деп танитындарын алға тартқан болатын...