Тексеруге өткізген соң "жоғалып кеткен" бала мәйітіне қатысты полиция түсінік берді

Алматы облысының полициясы нәрестенің өлімі және оның денесінің "жоғалып кетуі" оқиғасына қатысты ақпарат таратты, деп хабарлады paryz.kz.

Кейбір БАҚ өткен жылы 8 мамырда дүниеге келген шақалақтың бірнеше сағаттан кейін қайтыс болғанын хабарлады. Жас босанған әйелдің туыстары құжаттардағы қан тобы түзетілгенін және нәресте 7 мамырда, яғни тумай жатып ауырып қалды деп қате мәлімет көрсетілгенін айтты. Осыған байланысты ата-ана қайтыс болған өз баласы екендігіне күмәнданды. Сондықтан олар мәйітті эксгумациялауды талап етті.

Алматыдағы сараптама ешқандай нәтиже берген жоқ. Өткен қыста мәйіт Нұр-Сұлтанға жіберілген. Содан ол әлі кері қайтарылмаған. Давыдовтар отбасы ДНҚ-тест нәтижесін сол күйі алмады. Олар, сондай-ақ, өздеріне нәресте өлімінің себептері туралы ештеңе айтылмағанын алға тартты.

Полиция баланың мәйіті жоғалмағанын, оның туыстары зерттеу есебімен танысқаннан кейін тапсырылатынын хабарлады.

"Алматы облысының Полиция департаменті жүгінген Нұр-Сұлтан ХКБ мамандары сот-молекулалық-генетикалық сараптаманың қорытындысы бойынша В.В.Давыдова - қайтыс болған баланың анасы екендігінің 99.99999% ықтималдығы барын жеткізді. Жаңа туған нәресте өлімінің себебі туа біткен екіжақты пневмония, жүктіліктің 33 аптасында үзілуі және тіндердің жетілмеуінен болған. Сәбидің денесі туыстарына олар сараптама қорытындысымен танысқаннан кейін беріледі", - деп мәлімдеді Алматы облыстық ПД баспасөз қызметі.