Қонаевтың туыстары жаңа ескерткішке наразы

Қазнет қолданушылары Алматы облысында орнатылған Қазақ КСР Компартиясы ОК бірінші хатшысы Дінмұхамед Қонаевтың жаңа ескерткішін сынға алып жатыр. Наразылардың арасында қайраткердің туыстары да болды, деп хабарлады paryz.kz.

Әлеуметтік желілерде мемориалдың "біртүрлі" екені талқыланып жатыр. Алғашқы кемшіліктердің бірін қазақстандық мүсінші Олжас Мұхамеди атап өткен.

"Қазақстандағы ескерткіштер мен мүсіндер туралы мәселені көптен көтеріп келемін. Таңданып қарап жүрмін, Президент осы мәселеге назар аударатын шығар" деп жазды мүсінші.

Ескерткіш туралы Дінмұхамед Қонаевтың жиені Жанар Мұқажанова пікір қалдырыпты.

"Мен және өзгелер ағамның сыртқы келбетіне әрдайым таңданатынбыз. Сондықтан мен өз жерім Бақанаста осы мүсінді көргенімде қатты ренжідім. Мүсінші бұл жоба туралы Қонаев қорымен келісуі керек еді", - деді Жанар Мұқажанова.

Сондай-ақ, белгілі заңгер Бақытжан Базарбек те осы мүсінге қатысты ойын айтқан.

"Қонаев ескерткішінің ашылуы - игі іс. Бір-ақ сұрақ: ол қандай ескерткіш? Мүсінші ескерткішке алған дененің пропорцияларын, тіпті, оның жиендері де танымады. Дене басымен салыстырғанда тым созылған, ал қолдары - өте үлкен. Арық қылып көрсеткен, иығы да дәу" деп жазды ол.

Еске сала кетсек, Алматы облысының әкімдігі құрылыс жұмыстарын демеушілер қаржыландырғанын айтқан болатын.

"15 қазанда Қазақстанның мемлекет және қоғам қайраткері Д.А. Қонаевтың ескерткішін орнату жөніндегі барлық тиісті құжаттарды тарих және мәдениет ескерткіштерін қорғау жөніндегі облыстық комиссия қарап, мақұлдады. Содан кейін барлық тиісті құжаттар Нұр-Сұлтан қаласына монументті өнердің жаңа құрылыстарын орнату жөніндегі мемлекеттік комиссияның қарауына жіберілді. Қазіргі уақытта Балқаш ауданының Бақанас ауылында бастапқы құрылыс жұмыстары жүргізілуде", - деп хабарлады Алматы облысының мәдениет, архивтер және құжаттама басқармасы.