"Мұхаммед емес, мен": Талдықорған тұрғыны өзін пайғамбармын деп жариялады (ВИДЕО)

Алматы облысында Хан Досаев есімді азамат өзін алғашқы пайғамбармын деп жариялады. Ол өзінің миллионыншы рет жаңа кейіпте өмірге келгенін айтады. Жаңа дін ойлап тапқан азамат коронавирустан жазылудың да жолын біледі екен деп хабарлайды Paryz.kz.

Бірінші пайғамбар Мұхаммед емес, Будда емес, Иисус және басқалары емес. Бұл – Хан ата. Бұл – мен, - деді талдықорғандық жігіт Almaty.tv телеарнасына.

Хан Досаевтың айтуынша, ол динозаврлар дәуірінде туған. Ал пайғамбар екенін 2011 жылы Құдаймен көріскенде түсініпті.

Қараңғы бөлмеде жатқанмын, содан кейін жартылай ұйқыға баттым, сол сәтте маған аян келеді. Құдай: "Хан, сен алғашқы Пайғамбарсың, сен бұл дүниедегі адамдардың қателерін шешуге келдің" дейді. "Мынау - 6 ғарыштың заңы. Сен осы арқылы әлемдегі бүкіл қатенің бәрін түзеп шығасың" деп айтты, - дейді Талдықорған тұрғыны.

Оның сөзінше, ол "Жер" деп аталатын жаңа дін ойлап тапқан. Ол сенімге емес, математикаға құрылған. Мұсылмандық пен христиандықтан оны "өзгешелеп" тұратыны да осы екен.

Хан Досаев Құран Кәрімнің баламасы ретінде жинақ шығарған. Ішінде ережелер мен заңдылықтар жазылған. Алайда математикалық формула түрінде сипатталған.

Талдықорғандық өз ілімін мінсіз деп санайды, ал өзі айтқан "Жер" дінінде ішімдік пен темекіге рұқсат бар. Бастысы – шегін білу.

Ол сондай-ақ коронавирусты жеңе алатын күшке ие екенін айтқан.

Коронавирустың мәселесін менің тұқымыммен (шәует – ред.) шешуге болады. Мысалы, адам менің тұқымымды ішсе, ол коронавирустан жазылып кетуі мүмкін, - дейді Хан Досаев.

Талдықорғандықтың бұл мәлімдемесіне қатысты имамдар да пікір білдірді. Талдықорған қалалық "Иман" мешітінің имамы Қамит Табарақ тарихта мұндай адамдардың артынан ешкім ермегенін айтты.

Өзін жалған Пайғамбармын деп жариялаған өтірікші адамдарға қарата айтылған "Қиямет күніне дейін 30 адам осылай өзін жариялайды" деген хадис бар. Бірақ олардың саны одан да көбірек болуы мүмкін. Тарихта мұндай адамдардың артынан ешкім ермеген. Ермейді де!" - дейді ол.