Оралда аулаларды абаттандыру жалғасуда

Қазіргі таңда кешенді абаттандыру жұмыстары жүріп жатқан аулалардың бірі – Әлия Молдағұлова көшесіндегі 7-үйдің аумағы.

Жергілікті тұрғындар басталған жұмыстардың нәтижесіне риза екендіктерін айтады.  Әсіресе спорт және балалар ойын алаңдарының салынуы қариялар мен балалар үшін ыңғайлы.

– Бұған дейін аулада ескі әткеншек пен сырғанақ қана болды. Ауланың барлық балалары үшін бұл аздық етеді. Алдағы уақытта жаңа ойын алаңы салынып, балаларымыз емін-еркін ойнайды деп сенеміз, – дейді аталмыш ауланың тұрғыны Александра Судакова.  

Қазіргі таңда Орал қаласында 498 аула бар. 2007 жылдан бастап бүгінгі күнге дейін 368 аула абаттандырылған.  Өткен жылы 11 аула аумағына кешенді абаттандыру жұмыстары жүргізілсе, биыл 29 аула кешенді абаттандырылуда.

–   Абаттандыру жұмыстары төрт бөліктен тұрады. Оның алғашқысы – асфальт төсеу жұмыстары болса, реттілігі бойынша жарықтандыру,орындықтар, қоқыс жәшіктері,ақпараттық тақталар орнату жұмыстары, балалар ойын және спорт алаңдарын салу жұмыстары жүргізілетін болады. Жыл соңына дейін абаттандыру жұмыстарының 3 бөлігі орындалады. Ал балалар және спорт алаңдарын орнату жұмыстары қаржыландыру мәселесіне байланысты келесі жылға ауыстырылды, – дейді Орал қаласы тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Жандос Дүйсенғалиев.

   Жуырда Зашаған кентінде екі аула толықтай абаттандырылды. Ал жыл басынан бері кешенді жөндеу жұмыстарынан бөлек қалалық құрылыс бөлімі арқылы 20-ға жуық аулаға балалар және спорт алаңдарын орнатылды.

Тұрғындардың өмір сүру сапасын жақсарту мақсатында жыл сайын тұрғын үй аулаларын абаттандыру бойынша жұмыстар жүргізіледі. Қараша айынан бастап uralsk.smartmap.kz геоақпараттық порталында кешенді абаттандыру жұмыстарына өтініш беру басталмақ.

Томирис СҰЛТАН