Енді БАҚ өкілдері офлайн форматта баспасөз конференцияларына қатыса алады

Бұл туралы Премьер-министрдің орынбасары Ералы Тоғжановтың төрағалығымен ел аумағында коронавирустық инфекцияның таралуына жол бермеу жөніндегі ведомствоаралық комиссияның отырысында белгілі болды деп хабарлайды Paryz.kz. 

Сондай-ақ эпидемиологиялық жағдайдың жақсаруына байланысты ведомствоаралық комиссия барлық санитариялық талапты қатаң сақтай отырып, брифингтер мен баспасөз конференцияларын күндізгі режимде өткізу туралы шешім қабылдады.

Оқи отырыңыз: Журналистер БАҚ өкілдерін Парламент пен Үкіметке кіргізуге үндеді

Осылайша, ҚР Президенті жанындағы Орталық коммуникациялар қызметі мен Өңірлік коммуникациялар орталықтары базасында ASHYQ қосымшасында "жасыл" мәртебесі бар БАҚ өкілдері офлайн форматта баспасөз конференцияларына қатыса алады.

Денсаулық сақтау министрі Алексей Цой елдегі санитариялық-эпидемиологиялық жағдай туралы баяндама жасады. Соңғы екі аптада COVID-19 аурушаңдығы 60%-ға, өлім деңгейі 80%-ға төмендеді. Инфекциялық төсек-орындар жүктемесі деңгейінің 56%-дан 33%-ға дейін, реанимациялық төсектердің - 45%-дан 32%-ға дейін төмендегені байқалады. 

Сонымен қатар ВАК келушілердің мәртебесін тексермейтін Ashyq жүйесінің 12 мың жосықсыз қатысушысын 2 аптаға жүйеден алып тастау туралы шешім қабылдады.

Ведомствоаралық комиссияның отырысын қорытындылай келе, Ералы Тоғжанов бірқатар нақты тапсырма беріп, ВАК қатысушыларының алдында таяу уақыттағы басым міндеттерді белгіледі.