Алматыда курьерлердің митингіге шыққаны туралы ақпарат жалған

Әлеуметтік желідегі бірнеше парақшада курьерлердің жиналып, шеруге шыққаны хабарланды.

Бейнежазбадағы ақпаратта жеткізу қызметімен айналысатын адамдардың жиналуына оларға арналған кәсіби мерекенің болмауы себеп болғаны айтылған.

Алайда қалалық Полиция депаратменті аталған фактіні жоққа шығарып, бұл фильм түсірілімі екенін мәлімдеді. Әлеуметтік желіде тараған бейнежазба түсірілім алаңында жасалғанын жауапты кинокомпания да растады.

– Кадрлар 6 тамыз күні кешке «SHEKER. Последний шанс» толықметражды киносының түсірілім алаңында куәгерлермен жасалған. Жобаны Sәlem Entertainment медиакомпаниясы Epicentrum кинокомпаниясымен бірлесіп жүзеге асырып жатыр. Жалпы түсірілім процессі толығымен аяқталды, кино күзде жарыққа шығады, - деп хабарлады Sәlem Entertainment медиакомпаниясының баспасөз қызметінен.