Астана
-10.03°C
Астана
-10.03°C
Бала құқықтары жөніндегі уәкіл Динара Зәкиева Алматы облысында ауруханада жатқан зорланған 3 жасар қыздарға, сондай-ақ олардың бауырлары тұрып жатқан Сәбилер үйі мен Балалар үйіне барды, деп хабарлайды Paryz.kz ҚазАпаратқа сілтеме жасап.
Уәкіл бұл балалардың өмірі нағыз тозақ болғанын айтты.
«Бұл қыздардың 7 жасар әпкесіне де бұрын қорқынышты қылмыс жасалған және жазасыздықтың, маскүнемдіктің және толық деградацияның салдарынан бұл қылмыс қайталанып отыр. Кеше аудандық полиция департаментімен, денсаулық сақтау және білім басқармаларымен бұрын болған оқиғалардың барлық тізбегін зерттеп шықтым. Екі жыл бұрын егіздердің анасы мен өгей әкесі 7 жасар қызының жыныс мүшесін көсеумен күйдірген, бұл қыз бала оқыған интернатта анықталды. ҚР Қылмыстық кодексінің 140-бабы бойынша іс қозғалған (дегенмен бұл 110-бап «Азаптау» болуы керек) және ата-ана құқығынан айыру туралы мәселе қойылған», - деп жазды Динара Зәкиева Facebook желісінде.
Уәкіл бұл істің қате бап бойынша жүргізілгенін (110-баптың орнына 140-бап) және баланың өгей әкесі азаптауға қатысса да (іс материалдарында бар), анасы ғана жазаланғанын айтуда.
«Екіншіден, сот ата-ана құқығынан айыру туралы өтінішті қабылдамаған және айыппұл салған. Нәтижесінде бала үйде оқытуға ауыстырылған және бұл тозақта тағы екі жыл өмір сүрген. Қазір анықталғандай, олар зорлау белгілерін жасыру үшін күйдірген. Егер екі жыл бұрын кінәлі жазаланып, «Азаптау» бабы бойынша отырғызылса, үш баланы құтқаруға болар еді. Осыған байланысты, тексеру жүргізіп, бұзушылықтар үшін барлық жауапты тұлғаларды жауапқа тарту қажет деп санаймын. Бұл үшін барлық қажетті шараларды мемлекеттік органдармен бірге қабылдаймыз», - деді Д. Зәкиева.
Бұл жағдай мен жалпы статистика тағы бір мәселені көтереді. Бүгінде ішкі істер министрлігінің мәліметінше, отбасылық-тұрмыстық саладағы қылмыстардың 70%-ы алкоголизммен және әлеуметтік жағдайдың төмендігімен байланысты.
«Бұл қылмыстар күн сайын 342 адамға жасалады. Әр санның артында әйелдің, баланың өмірі мен тағдыры жатыр. Көптеген өңірлерде, мысалы, Жетісу облысының кейбір ауылдарында, Түркістан облысының 14 ауылында алкоголь сатуға тыйым салынғанын және іс жүзінде қылмыс жоқ екенін білемін», - дейді бала құқығы жөніндегі уәкіл.
