«Басын кесіп алған»: Алматыда әйелді өлтірген ер адамға сот үкімі шықты

Алматы қалалық Қылмыстық істер жөніндегі мамандандырылған ауданаралық сотында үйсіз-күйсіз алматылық әйелді өлтіріп, денесін бөлшектеді деп айыпталған Асхат Иманқұсовқа қатысты басты сот талқысы аяқталды. Сот отырысы алқабилердің қатысуымен өтті.

Іс талқысына төрағалық еткен судья Мартпек Кәкімжанов үкімді жария ете отырып, сот Асхат Иманқұсовты кінәлі деп танып, оған 20 жылға бас бостандығынан айыру жазасын тағайындау туралы қаулы шығарғанын атап өтті.

Бұған дейін прокурор Жаңыл Жұмабаева алқабилерге қылмыс орнынан түсірілген және Иманқұсовтың кінәсін дәлелдейтін іс материалдарындағы суреттер мен бейне жазбаларды көрсетіп, таныстырған болатын.

Басы кесілген әйелдің денесі 2023 жылдың сәуір айының соңында қараусыз қалған ғимараттың жанынан табылды, жәбірленушінің кесіп алынған басын қаскөй дүкенге қалдырып кеткен. 

20 қыркүйекте сот процесі кезінде құрбанның таныстарынан сұрақ-жауап алынды.