Атырау қаласындағы жекеменшік балабақшада 3 жасар қыздың саусағы жұлынып кетті

Бүлдіршін балабақшада әткеншек тепкен кезде жарақат алған-мыс. Соның салдарынан қыздың төртінші саусағы жұлынып кеткен. Баланың қалай жарақат алғаны әзірге белгісіз. Оның ата-анасы полицияға балабақша әкімшілігі тарапына шағым жазды. Бүлдіршінді облыстық балалар ауруханасына тәрбиешілер жеткізген.
Оның ата-анасына медициналық жәрдем көрсетілгеннен кейін хабар берген. Жазатайым оқиға түске дейін болған.

"Бала ауруханаға сағат 11:20 шамасында жеткізіліп, дәрігерлер көмек көрсеткен. Оған "тырнақ пластинасының зақымдануы мен қолдың ашық саусақ жарасы" деген диагноз қойылған. Саусақтарының рентгенографиясы жасалып, жара хирургиялық жолмен емделіп, таңылып, инфильтративті анестезия жасалған. Салдарынан сол қолдың төртінші саусағы жыртылған", - делінген облыстық денсаулық сақтау басқармасының баспасөз қызметі таратқан хабарламада.

Медициналық ем-дом жасалған соң, бүлдіршін үйіне қайтарылған.
Атырау облысы полиция департаментінің баспасөз қызметі аталған дерек бойынша ҚР Қылмыстық кодексінің 141-бабына сәйкес, яғни балалардың өмiрi мен денсаулығының қауiпсiздiгiн қамтамасыз ету жөнiндегi мiндеттердi тиісінше орындамау дерегі бойынша сотқа дейінгі тергеу басталғаны туралы хабарлады. Сот-медициналық сараптама тағайындалды.