Астана
-12.03°C
Астана
-12.03°C
Алматыда тіркелмеген Демпартияның көшбасшысы Жанболат Мамайға қатысты Бостандық ауданының №2 сотының кезекті отырысы өтті, деп мәлімдейді Paryz.kz ақпараттық агенттігі Ulysmedia.kz сайтына сілтеме жасап.
Жанболат Мамайдың айтуынша, 27 желтоқсандағы отырыста Демпартия белсенділері Нұрбол Қасымбеков пен Гүлнар Мирмамбетова куәгерлер ретінде тыңдалған.
"Олар қаңтар айында көргендері туралы ашық айтты – Жанболат оны полиция алып кетер алдында адамдарды "Алматы Арена" маңында бейбіт акция өткізуге шақырғанын және ол кредиттік рақымшылық туралы жалған ақпарат таратпағанын", – делінген Мамайдың әлеуметтік желідегі парақшаларында.
Белсендінің айтуынша, прокурор Еркін Баймағамбетов куәгерлерге қысым көрсетуге тырысқан, оған жауап ретінде Демпартия жетекшісі мемлекеттік айыптаушыға сұрақ қойған:
"Ол кезде Алматы әкімі Сағынтаев қайда болған? Неліктен сіз оған бұл сұрақты қоймадыңыз?”.
Сот екі тарапты да шыдамдылық танытуға шақырды.
Келесі отырыс 2023 жылдың 6 қаңтарында өтеді. Бұл күні қалған куәгерлер тыңдалады. Мамайдың өзінен 10 қаңтардағы отырыста жауап алынбақ.
Естеріңізге салсақ, Жанболат Мамайға "көрінеу жалған ақпарат таратты", "билік өкілін қорлады" және "бейбіт жиналыстарды ұйымдастыру мен өткізу тәртібін бұзды" деген айыптар тағылып жатыр. Ол ақпан айының соңынан бері қамауда.
