COVID-19: алматылық дәрігер індетке вакцина салдырғаннан кейін шалдықты

Алматылық дәрігер вакцинация салдырғаннан кейін коронавирус жұқтырды, деп хабарлады paryz.kz, Тengrinews.kz-ке сілтеме жасап.

Гинеколог-эндокринолог Иван Мельников репродуктивті медицина институтында жұмыс істейді. Ол өзіне Sputnik V вакцинасын 2 наурызда салдырған.

"Менің медбикем және басқа бірнеше қызметкер вакцинациядан кейінгі алғашқы үш күнде әлсіздік сезінді, денеде ауырсынулар пайда болды. Олардың температурасы 37,5 градусқа дейін көтерілді. Менде алғашқы бірнеше күнде мұндай белгілер болған жоқ", - деді ол.

Алайда 8 наурыз күні кешке дәрігер аяғында әлсіздік байқалғанын айтады. Ол өзін шаршап тұрмын деп ойлап, ауырғанына мән бермеген. Бірақ келесі күні таңертең дәрігерде жөтел басталған.

"Сағат 14.00-ге дейін менде қатты әлсіздік, ауырсыну байқалып, басым, белім мен аяқтарым ауырды. Дене қызуым көтеріле бастады. 10 наурызда мен ПТР тест тапсырдым. Ертесінде коронавирус жұқтырғаным анықталды", - деп қосты гинеколог-эндокринолог.

Иван Мельников вакциналар коронавирустан толық қорғай алмайтынын айтады. Ол әлемдік медицинада "коронавирустың қорғаныс дәрежесін вакцинация нәтижесінде пайда болған антиденелер деңгейімен корреляциялауға" мүмкіндік беретін нақты мәліметтер жоқ екенін атап өтті.

"Біріншіден, антиденелер аз мөлшерде немесе жеткілікті мөлшерде жасалуы мүмкін. Олар жеке реакцияның әсерінен болмайды. Мұндай жағдайлар сирек кездеседі. Екіншіден, антиденелердің қай деңгейі инфекцияны жұқтырмас үшін жеткілікті немесе жеткіліксіз екенін ешкім сенімді түрде айта алмайды. Бұл проблемалар әлемдегі барлық вакциналарға тән", - деді ол.

Алматы қаласы қоғамдық денсаулық сақтау департаментінің мәліметінше, Мельников коронавирус анықталғаннан кейін дереу дәрігерлерге жүгінген.

"Науқас коронавирус белгілері байқала салысымен дәрігерлерге жүгіріп, жедел жәрдем шақырды. Ол модульдік ауруханаға жеткізілді. Науқас коронавирустық инфекцияның орташа формасымен ауырып, 7 күн ауруханада жатты. 19 наурызда ол амбулаторлық бақылау үшін үйге шығарылды. 17-қалалық емхана күн сайын науқастың жағдайына бақылау жүргізеді", - деп атап өтті Алматы қалалық денсаулық сақтау басқармасы.