Таразда коронавирус жұқтырған депутат госпитальдің суық екенін айтты

Таразда коронавирусқа шалдыққандарды емдейтін стационарда түнімен жылу болмай, науқастар тоңып шыққан. Суықтан кейбірі ауруын асқындырып алыпты. Кесел жұқтырғандар арасында қалалық мәслихат депутаты да бар екен. Ол мәлімдеме жасағаннан кейін ғана ғимаратқа жылу берілген көрінеді, деп хабарлады paryz.kz, КТК телеарнасына сілтеме жасап.

Қауіпті дертке шалдыққан депутат Эльмира Мырза-Ғали біраз уақыттан бері инфекциялық стационарда ем алып жатыр. Оның сөзінше, ғимараттың кіреберісінен еріген қар суы сорғалап ағып тұр. Мекеменің іші суық, крандағы су салқын. Ол аздай, түнімен жылу болмаған. Соның салдарынан науқастардың бәрі тоңып-жаурап, көбінің температурасы көтеріліп, жөтелі асқынған. Мұндай бассыздыққа әбден ыза болған депутат іштегі қолайсыз жағдайды таспаға түсіріп, түнде әлеуметтік желіге жариялаған. Ал ертесіне дереу жылу қосылады.

Депутат телеарна тілшілеріне мән-жайды айтудан бас тартыпты. Айтуынша, денсаулығы нашарлап, бас көтере алмай жатыр екен.

"Қазандықтан ақау шықты. Бұл біздің қолымыздағы шаруа емес, оған жылу мекемесі жауапты. Олар бүгін таңертең келіп, жөндеп берді. Біз сол мекемеге нарызылығымызды білдіріп хат жазғалы отырмыз. Дайындап та қойдық. Науқастар жылусыз қалмауы тиіс", - деді Тараз қалалық №1 ауруханасы бас дәрігерінің орынбасары Ербол Ордабеков.