21 наурыздан бастап Нұр-Сұлтанда локдаун енгізіледі

Нұр-Сұлтан қаласының "қызыл" аймаққа енгенін ескере отырып, жексенбі күні, яғни 21 наурызда елордаға локдаун енгізіледі деп хабарлады paryz.kz, елорда әкімдігінің баспасөз қызметіне сілтеме жасап.

Жексенбіде СОО, СҮ, СО (оларда орналасқан дәріханаларды, сондай-ақ тамақ өнімдері мен бірінші кезекте қажетті заттарды сататын және орналасқан жеріне қарамастан қызметіне рұқсат етілген объектілерді қоспағанда), жабық азық-түлік емес базарлар, азық-түлік емес тауарларды өткізетін объектілер, жабық спорт объектілері, ХҚО, "Қазпошта" АҚ секілді мекемелердің жұмыс істеуіне тыйым салынады.

Сондай-ақ дезинфекциялық жұмыстар жүргізілуіне байланысты жексенбі күні қоғамдық көліктің жұмысы тоқтатылады. Сенбі және жексенбі күндері фитнес-орталықтардың, фитнес-клубтардың, спорттық-сауықтыру объектілерінің, сауналардың, СПА-орталықтардың ("сары аймақ" критерийлері қолданылатын "Ashyq" пилоттық жобасына қатысатын объектілерді қоспағанда) жұмысына тыйым салынады.

"Қаладағы эпидемиологиялық жағдай тұрақсыз. Өткен мереке күндерінен кейін коронавирус инфекциясын жұқтырушылар саны күрт көбейді. Осыған байланысты қосымша карантиндік шектеулері бар қаулы 18 наурыздан бастап қолданысқа енгізіледі. Наурыз мейрамына орай бұқаралық іс-шаралар өткізуге тыйым салынады. Індеттің өршуіне жол бермеу керек. Медициналық ұйымдар мен медицина қызметкерлеріне шамадан тыс жүктеме болмас үшін қатаң санитарлық нормалар сақталуы қажет, яғни бетперде тағып, әлеуметтік қашықтықты сақтау керек", - деді Нұр-Сұлтан қаласының бас мемлекеттік санитарлық дәрігері Сархат Бейсенова.

Оның айтуынша, 18 наурыздан бастап қоғамдық тамақтану объектілерінің (мейрамханалар, дәмханалар, барлар, асханалар) жұмыс уақыты жұмыс және демалыс күндері сағат 07:00-ден 22:00-ге дейін қысқарады.

Сондай-ақ 18 кинотеатр мен кинорумдардың жұмысына тыйым салынады. 

Еске сала кетсек, осыған дейін Алматы қаласының бас санитарлық дәрігері Жандарбек Бекшин де онлайн-брифингте қалада қандай жағдайда локдаун енгізілетінін айтқан болатын.