Мемлекеттік бюджеттің шығыстары 91 пайызға атқарылды. Бұл туралы Үкімет отырысында Қаржы министрі Ерұлан Жамаубаев биылғы қаңтардағы мемлекеттік бюджеттің атқарылу көрсеткіштерін баяндау кезінде айтты, деп хабарлады paryz.kz.
"Мемлекеттік бюджеттің шығыстары - 91 пайызға, республикалық бюджеттің шығыстары - 94,4 пайызға, жергілікті бюджеттердің шығыстары 80,6 пайызға атқарылды", - деді министр.
Оның айтуынша, республикалық бюджет бойынша 1 трлн 212 млрд теңге сомасына шығыстар жүргізілген. Орындалмау 72 млрд теңгені құрады, оның ішінде үнемдеу - 7 млрд теңге, игерілмеу сомасы - 65 млрд теңге.
Ірі сомаларды игермеген мемлекеттік органдар: Қаржы министрлігі, Цифрлық даму министрлігі, Инновациялар және аэроғарыш өнеркәсібі министрлігі, Төтенше жағдайлар министрлігі, Білім және ғылым министрлігі, Мәдениет және спорт министрлігі.
Негізгі себептері: төлем жөніндегі құжаттарды ұзақ келісу; орындалған жұмыстар актілерін уақтылы ұсынбау; нақты көрсетілген қызметтер көлемі; шарттар мен қосымша келісімдерді қазынашылық органдарына тіркеуге кеш ұсыну.
Жергілікті бюджеттердің шығыстары - 203 млрд теңге. Атқарылмағаны - 49 млрд теңге. Биыл өңірлерге 1,9 трлн теңге сомасында нысаналы трансферттер көзделген. Оларға 1 ақпандағы жағдай бойынша 32 млрд теңге бөлінген. Олардың 79,3 пайызы игерілген. Атқарылмағаны - 6 млрд теңге, оның ішінде 2 млрд теңге - үнемдеу, 4 млрд теңге игерілмеген.
Ірі сомаларды игермеген өңірлер: Батыс Қазақстан облысы, Жамбыл облысы, Нұр-Сұлтан қаласы, Ақмола облысы, Атырау облысы.