Балама жол бар – "ҚазМұнайГаз" Каспий құбыр консорциумындағы жағдай туралы

"Қазір КҚК штаттық режимде жұмыс істеуде. Біз Үкіметке осы мәселе бойынша үздіксіз жұмысты қамтамасыз ету үшін қолдау көрсеткеніне ризамыз. КҚК акционерлері қатарында қазақстандық және ресейлік тараптар, халықаралық компаниялар бар. Олардың әрбірі мұнай тасымалының жалғасуына мүдделі.

Бірақ бізде баламалы экспорттық бағыттар бар екенін атап өткім келеді. 1991 жылы Қазақстаннан тек бір ғана "Атырау-Самара" экспорттық бағыты болды, 30 жыл ішінде КҚК, Атасу-Алашанькоу (Қытай), Кеңқияқ-Құмкөл сияқты түрлі мұнай құбырлары салынды. Бізде шетелге шикізат тасымалдау мүмкіндігі бар Ақтау порты бар. Бұл жобалардың барлығы жұмыс істеуде, алайда бұл бағыттар бойынша одан әрі инвестиция салу үшін олардың экономикалық тұрғыдан тиімді болуы тиіс екені түсінікті", – деді Дәурен Қарабаев.

Айта кетейік, бұдан бұрын экономист Жарас Ахметов Ресейді айналып өтетін мұнай құбырын 2014 жылдан бастап салу қажет болғанын айтқан еді.

«Мұнай тасымалдаудың балама жолдарын жасау қажет болды ма, жоқ па деп айтысып жатқандарға айтарым: 2014 жылға дейін КТК және Транснефть балама қажет етпейтін сенімді бағыттар болды. Бірақ 2014 жылы кенет Путин тек болжап болмайтын адам ғана емес, сонымен қатар мессиандық кемшілігі бар саясаткер екені анық болды. Бұл КТК мен Транснефть кез келген сәтте сенімсіз бағытқа айналуы мүмкін деген үлкен қауіп бар дегенді білдіреді. 2014 жылдан бастап мұнайымызға балама жолдар жасау қажет еді», - деп жазды ол желіде.