Қашан да көкейіндегісін ірікпей, бірдеңені біліп һәм тіліп айтатын әріптесіміз Тоқтар Жақаш бұл жолы атышулы Мұхамеджан Тазабекке шүйлікті.
Facebook-тегі жазбасын: "Сәләфиттердің саржағал балапандары "Хабар" мен "Қазақстан" арналарында толып қалған еді. Енді Мұхамеджан Тазабектің ұлттық арна эфиріне шығуы масқараның масқарасы дер едім", - деп бастаған ол, "сақалды ақынның" бұл беталысынан кәдімгідей күдіктеніп.
"Сонда, енді Мұхамеджан ұлттық арнадан бізге пәлсапа соқпақшы ма? Оған ондай трибуна кімнің пәрменімен берілді?! "Тәлім-тренд" деген дүниесі осыдан 4-5 жыл бұрын ютубта мың рет айналып, әбден жауыры шыққан. Енді сол сарқыншағын ұлттық арнадан төгуге де ұят керек шығар! Мұхамеджанға өзінің діни арнасы аздық еткен бе?" - дейді Тоқтар Жақаш.
Айтуынша, егер Мұхамеджан әйелдерге тәлімді сабақ беретін ұзынетекті сақа қатын немесе 70-80 жасаған кемпір болса, түсінуге болады. Бірақ, ол ақ жаулықты ана емес, қауға сақалды ер ғой.
"Қай қазақтың еркегі ерлі-зайыптыға ақыл айтып еді? Мен өз басым балаларымның өміріне қарғыс айтқыш сәләфиттердің қол сұғып, ақыл айтуына үзілді-кесілді қарсымын! Бұл енді тым перебор! "Еститін үкімет" көрерменнің талабын естиді деп ойлаймын! Сектанттар идеология саласынан аулақ жүрсін!" - деп салды ашынған әріптесіміз.
Қазекең қашанда айтқыш қой, Әсет Оразхан деген азамат журналист жазбасына бірден: "Тебу темасын толкать етпекші ме тағы?" - деген пікір қалдырыпты. Ал Алтынбек Төре есімді желі қолданушы: "Қазақстан арнасы іріп-шіріп бітті! Көрсететін ештеңесі қалмады. Сосын Тұрсынбектің сайқымазағы мен Мұхамеджанның пәлсапасын көрсетеді. 10 жылдан асты, телевизор көрмегелі. Қазір антенна жоқ. Тек ютуб қарайды балаларым", - деп отыр.
Басқа пікірлер легін әлеуметтік желінің мүмкіндігі көтергенмен, БАҚ бетінде бақырайып тұруы ыңғайсыз. Сондықтан қалған әңгіме – жоғарыдағы сілтемеде.