«Адам ғұрлы көрмейді»: Белгілі ақын Бауыржан Есебаевтың қателігін айтты

«Әсіресе, ән мәтінінің авторын елемеу қою, көп жағдайда танымау әлі де белең алып тұр. Тіпті бір уақыттары жастар арасында кеңінен таралған “үндемейсің” немесе “8 701…” деп аталатын өлеңімді композитор Бауыржан Есебаев меншіктеп алып, әніне пайдаланды. Ол тіпті сол уақыттағы рейтингі жоғары бағдарламалардың тақырыбына тұздық болып, біраз талқыланған. Сол кезде айтқанмын, Есебаевтың есесі осымен түгелденіп тұрса, өлеңімді қидым деп. Ал ол «ешкім оқымайтын өлеңін ән ғып, хит қылғаныма қуанбай ма» деп әңгіме айтыпты.

Бауыржан Есебаевтың қателігі сол, менен рұқсат сұраған жоқ. Сұрамаса да интернетте кімнің өлеңі екені көрініп тұр. Екіншіден, одан кейін «бұл өлеңнің авторы мен ғой» дегенде де «кешір, айналайын, білмей қалдым, авторын жазып қояйын» деп, азаматтық танытып қоюға болатын еді. Үшіншіден, өлеңімнің сөздерін рұқсатсыз өзгертіп, өзінікі деп пайдаланған.

Бет-жүзін көрген емеспін және дауласуға да құлқым жоқ. Жалпы, менің мүлкім – өлеңім. Ол арзан болсын, қымбат болсын, оны біреу өзіне меншіктеп алуға құқығы жоқ. Әніш-сазгерлерде ақынды адам ғұрлы көрмеу, концерттерде әннің сөзін жазған авторды атамай кету, әйтеуір ақынға деген бір менсінбеушілік бар», - деді. “8 701…” деп аталатын өлеңіне жазылған әнді шырқаған Еркін Нұржанов пен Сырым Исабаев та хабарласпағанын айтты.

«Әншілер де өзінің кімнің өлеңін айтып жүргенін білмейді. Әнді сатып алады да ақынмен сөйлеспейді. Автор сөзінде не мән-мағына бар деп ізденбейді», - деді Асылзат Арыстанбек.